Balhug na sa presuhan ang usa ka tawo nga nilugos ug nidunggab sa iyang “childhood crush” nga silingan didto sa General Santos City.
Giila sa Lagao Police Station ang suspek nga si Arjay Cadungog Villapez, 22, alias “Dodong”, mananagat, residente sa Purok Minanga, Barangay Buayan diin didto ra sab nahitabo ang krimen pasado alas 3:00 kaganihang kaadlawon, Martes, Agosto 5, 2025.
Segun sa inbestigasyon nag-inusara ra nga natulog sa iyang kwarto ang biktima nga 21-anyos, 4th year college student sa usa sa mga eskwelahan sa naasuyng siyudad.
Nakuha gyud sa suspek ang pagkababaye sa biktima sanglit gitiunan kini ug kutsilyo nga nisangpot pa gyud sa pagpanunggab dihang niabot sa punto nga nilugnot na ang biktima ug nisukol.
Nakasinggit na ug panabang ang biktima sanglit nihimo na sab ug kasaba ang nahitabo kanila nga nadungog na sa mga silingan nga mao na ang nidala sa estudyante sa ospital.
Usa sa higala sa suspek nibutyag nga ang suspek niangkon kaniya nga crush gyud niya ang biktima apan dili gyud siya makaingon sanglit mataha kini tungod kay gwapa ang biktima apan batig nawong ang maong suspek.
“Hangtud crush lang gyud sa Boss kay siyempre di man ta makapasar sa atun nga kuan sa iyaha, gwapa, kay kita pangit ra man pud ” segun sa maong amigo sa suspek nga nahinabi sa usa ka tigbalita.
Nadakpan ra hinoon ang suspek sa kapolisan ug mga opisyal sa barangay sa gipahigayon nga hot pursuit operation human dunay nakatudlo kun diin nagtago ang suspetsado.
Sumbong rape ug frustrated murder ang gikatakdang ipasaka batok sa suspek.
📷 Max News FM Socsargen
