(hulagway gikan sa FB sa resort nga giingong didto nahitabo ang insidente sa City of Naga, Cebu)
(ang suspek nga ulitawo (nagtalikod nga nagtabon sa nawong) kinsa nipanghimakak sa pagpanglugos
By: PAUL LAURO
Gipreso karun ang usa ka hamtung nga lalaki human siya gipasanginlan nga nilugos sa 17-anyos nga iyang gikainom atul sa usa ka debut party sa usa ka resort sa City of Naga, Cebu
Ang suspek nga si alias Kian, 24, taga Barangay Awihao, Toledo City gisikop pasado ala 1:00 sa hapon niadtong Lunes, Hunyo 1, human sa hitabo sa usa ka private beach resort nga nahimutang sa Barangay Langtad.
Positibo siyang gitudlo sa biktima nga si alias “Maria”, 17, Grade 11 sa usa ka pribadong eskwelahan kinsa residente sa Brgy. East Poblacion sa nahisgutang siyudad.
Segun sa asoy sa biktima ngadto sa City of Naga Police Station Women and Children Protection Desk (WCPD) nga diha nahitabo sa “Room 8” sa resort ang pagpanglugos mga alas 8:00 ang takna sa buntag human sila nagkainom atul sa usa ka debut diin siya inbitado.
Apan ang suspek kinsa gidakop human ni-report ang biktima sa kapolisan kuyog sa igsoong babaye niini nipanghimakak nga iyang nahilabtan ang maong dalagita.
Giangkon sa suspek nga nakatulog ang biktima sa kwarto nga didto sab siya human sila nagkainom hangtud na pagka-kadlawon atul sa debut sa iyang ig-agaw apan wala gyud kini mahilabti.
“Dili na tinuod oi- wala ko manghilabot atung bayhana. Inosente ko,” asoy pa sa suspek kinsa ulitawo dihang gihinabi sa DyHP RMN Cebu ug Newstar Philippines.
Dihang daw nahuwasan na ang biktima sa kahubog ug nakamata nisumbong dayon kini sa iyang igsoong babaye ug nidangup sila sa police station hinungdan nga gihimo dayun ang hot pursuit operation ug naabtan pa nga didto pa gihapon sa resort nga giingong nahitaboan ang suspek maong gidakop.
Taliwala sa panghimakak sa suspek, kun ugaling mahingpit sa kapolisan ang mga ebedensya batok kaniya ilabi na ang resulta sa medico legal examination, tukmang kasong kriminal nga kalapasan sa R.A. 8353 (Anti-Rape Law of 1997) in relation to R.A. 7610 (Special Protection of Children Against Abuse, Exploitation and Discrimination Act) ang ipasaka batok sa suspek kinsa gipreso sa City of Naga Police Station cusrodial facility. /with a report from CCO
