Gikunpirmar sa kapolisan nga ang napalgang patay lawas nga nag-utaw-utaw didto sa kadagatan sa Barangay 99 (Diit), Tacloban City kaganihang buntag, Lunes, Agosto 4, mao ang babaye nga sa sayo pa gi-kidnap sa tulo ka mga armadong lalaki didto sa Barangay Valencia, Ormoc City.
Giila mismo ang biktima sa iyang pamilya nga mao si Aquenee Anthea “Akini” Arradaza, 35, single mom, kinsa gidagit sa maong tulo ka lalaki nga sakay sa usa ka black Toyota Wigo didto sa National Highway sa Valencia niadtong Hulyo 31 sa buntag.
Segun sa mga CCTV footage, ang maong sakyanan nipaingon sa direksyon sa Kananga, Leyte ug wala na makita sukad niadtong adlawa ang biktima nga dunay tulo ka mga anak.
Si Police Regional Office (PRO 8) Regional Director PBGEN JAY CUMIGAD nimando na sa Ormoc City Police Office ug Tacloban City Police Office nga muhimo ug koordinasyon sa pag-inbestigar ug pagsulbad sa maong kaso.
Anaa na sa state of decomposition ug niburot na ang patayng lawas sa biktima dihang nakit-an kini sa mga mulopyo sa Barangay Diit.
Ang inahan sa biktima ni-post sa Facebook sa nahitabong pagdagit sa iyang anak didto sa atbang sa ilang tindahan sa Valencia, gani nidangup kini sa iyang mga paryente nga naa sa kapolisan ug kasundalohan arun mapangita ang iyang anak.
Hustisya ang awhag sa maong inahan sa nadangatan sa iyang anak diin nasayran nga ang biktima mao ra gyud ang nangita ug pamaagi nga mabuhi niini ang tulo niya ka mga anak nga pulos lalaki.
(ang gi-post sa Facebook sa inahan sa biktima human sa nahitabo nga kidnapping)
