Kalit nga ni collapse sulod sa basketball court ug namatay gyud ang usa ka batan-on kagabii didto sa Barangay Camanjac, Dumaguete City , Byernes, Hulyo 25, 2025.
Giila ang nakalas nga si Chris Justin Soler, 24, taga Lower Camanjac kinsa kalit lang ni-collapse sa ilang duwa batok sa Barangay Cantil-e sa gipahigayon nga Boni Catarata Memorial Cup 30 and under basketball tournament nga gipasiugdahan sa Dumaguete City government ug sa Sangguniang Kabataan (SK).
Gidala pa kini sa Holy Child Hospital sa naasuyng siyudad apan wala na gyud kini matabang tungod sa “cardiac arrest” nga nahitabo sa maong batan-on nga nakaduwa kanhi sa Central Visayas Regional Athletic Assocation (CVRAA) nga nag-representar sa siyudad alang sa high school basketball team.
Ang Sangguniang Kabataan sa Barangay Camanjac nipadayag sa ilang mga pahasubo ngadto sa pamilya ug mga kahigalaan ni Soler.
“Thank you, 𝐂𝐫𝐢𝐬 𝐉𝐮𝐬𝐭𝐢𝐧, for always carrying the Camanjac pride with honor and heart. You will forever be remembered”, segun pa sa facebook post sa SK sa Camanjac.
📷 Sangguniang Kabataan ng Barangay Camanjac
