Giunay ug tigbas patay sa usa ka maguwang ang iyang manghud tungod sa pagselos niya niini nga dunay relasyon sa iyang asawa.
Ang suspek nga si June Anthony Sato Pandian, 39, taga Purok 1-b Baring, Barangay Wangan, Calinan District, Davao City nigamit ug sundang nga machete sa pagtigbas patay sa iyang manghud nga si Jay Pandian,34, usa ka construction worker.
Nahitabo ang insidente mga alas 3:00 sa kaadlawon kagahapon, Dominggo, Hulyo 20, human nga nagkainom pa ang managsoon ug didto nahitabo ang panaglalis nga niresulta sa pagkonpronta sa suspek ngadto sa biktima tungod sa giingong relasyon niini sa iyang asawa.
Natribukar ang isyu sanglit nagsugod ra kini human nga giingong “gikamang” sa biktima ang asawa sa suspek ug didto na nagsugod ang relasyon sa duha.
Nahitabo ang panaglalis didto sa balay sa suspek diin iyang gikonprontar sab ang iyang asawa ug dihang nipauli na sa ilang balay ang biktima gisulong kini sa suspek ug gitigbas sa makadaghan.
Giapil sab sa pagtigbas ang live-in partner sa biktima ug ang anak niini nga wala pay tuig ang edad nga pulos nalandig sa Southern Philippines Medical Center (SPMC) sa naasuyng siyudad.
Segun sa kapolisan nga grabe gyud ang kasuko sa suspek sanglit gawas nga gitigbas sa makadaghan ang iyang igsoon, gidakdakan pa gyud ug bato ang nawong niini nga halos dili na maila ang itsura./CCO
