GENERAL SANTOS CITY- Hot water ug ipit karun ang sitwasyon sa lima ka mga polis didto sa General Santos City tungod sa pasangil nga nangilkil ug P50 nga pang-snacks gikan sa usa ka babayeng motorista.
Wala panganli ang maong lima nga dunay ranggo nga mga sarhento, corporal ug patrolman nga nadestino sa Tambler Police Station apan matud pa ni General Santos City Police Office (GSCPO) Director PCOL Nicomedes Olaivar nga gipaubos na sa “camp restriction”Β ang maong mga polis.
Gunikan sa maong panghitabo niadtong nilabayng Myerkules sa gabii, girelibuhan sab ang ilang hepe nga si PMAJOR Westly Matillano tungod sa command responsibility.
Nidako ang maong isyu sanglit niabot gyud sa 911 sa Camp Crame ang maong hitabo human ang reklamante nga taga Maasim, Sarangani Province (may laing report nga nagpuyo sab kini sa Banga, South Cotabato) nitawag ug diretso sa maong police hotline number ug nireklamo.
Segun sa reklamo nga gilisud-lisud ang biktima nga muagi sa ilang checkpoint ang sakyanan niini hinungdan nga nalangay kini pag-adto sa hospital sa Gensan diin nanganak iyang anak.
Human na-cleared ang sakyanan gipangayoan ug P50 nga pang-snacks ang maong reklamante nga nimahay sa mga polis nga siya madugay ug hold ug wala na maabti ang nadangatan sa iyang apo kinsa namatay sa pagkahimugso.
Sumala pa nga ang reklamante mupasaka gyud ug sumbong batok sa maong mga polis inig ka human ug pahimutang sa namatay niya nga apo.
Nakapasamot sa panghitabo kay nasayran nga walay scheduled checkpoint niadtong orasa sa National Highway Corner Mt. Sabrina, Purok Ngilay, Tambler ug usa ra ka patrol car nga dunay duha ka duty detail ang angayan nga ibutang maong kwestyunable ngano nga didto ang maong mga polis sa nahisgutang dapit. /CCO
π· BNFM Gensan
