By PAUL LAURO
MANDAUE CITY- Usa ka 18-anyos nga dalaga ang nasakmitan ug shabu balor ug P20.4 milyones kaganihang tungang gabii, Byernes, Hulyo 11, didto sa Sitio Maharlika, Barangay Tipolo ning maong siyudad.
Gibana-bana nga tres kilos sa maong illegal nga droga ang nasakmit gikan sa suspek nga si alias “Marie”, 18 anyos, mulopyo sa Barangay Sawang Calero, Cebu City.
Gitumbok nga High Value Individual (HVI) target sa drug watch list ang suspek kinsa nadakpan sa joint buy-bust operation sa mga sakop sa City Intelligence Unit (CIU) ug City Drug Enforcement Unit (CDEU) sa Mandaue City Police Office (MCPO), Regional Intelligence Division 7 (RID7), Philippine Drug Enforcement Group 7 (PDEG7) ug PDEA Regional Office 7.
Gisubay pa sa mga operatiba kun kinsa ang tinubdan sa shabu sa maong dalaga kinsa gikatakdang pasakaan ug tukmang sumbong kriminal basi sa Comprehensivre Dangerous Drugs Act of 2002 (Republic Act No. 9165)
