Patay diha-diha ang usa ka asawa human siya giunay ug pusil sa iyang bana kinsa namatay sab human kini nag-unay ug pusil sa iyang kaugalingon didto sa Brgy. Poblacion, Dimiao,Bohol kagabii, Hulyo 9, 2025.
Ang bana nga si alias “Dominique”, 56, kinsa municipal employee sa naasuyng lungsod nigamit ug .45 kalibre nga pistola pagpusil sa iyang asawa nga si “Leticia,” 56, dunay negosyo nga tindahan sa maong lungsod.
Kalit kaayo ang panghitabo pasado alas 6:00 kagabii diha ra sa sala sa balay sa magtiayon nga sila rang duha.
Ilang anak wala sa pagkahitabo ingon man ang ilang helper nga igo na lang nakadungog sa buto sa armas ug nagbuy-od na ang duha nga iyang naabtan.
Gipangdala pa sa ospital ang duha apan pulos gyud kini nakabsan sa ilang mga kinabuhi sanglit diha gyud sa ulo ang igo nilang duha.
Walay naestablisar nga motibo ang Dimiao Municipal Police Station sa panghitabo apan ang bana nga usa ka Certified Public Accountant (CPA) gituhuan nga naghambin ug “depression.”/CCO
