Bawal ang pagtawag ug “honorable” sa mga public officials didto sa Kidapawan City sa North Cotabato. Kini mao ang direktiba sa reelected nga mayor sa siyudad, Mayor Jose Paolo “Pao” Evangelista kinsa namulong niini sa pagsugod sa iyang ikaduha nga termino.
Miisyu ug direktiba si Evangelista nga lakip sa dili tawgon ug honorable ang Bise Mayor, city councilors ug barangay officials sa siyudad. “Naa tay bag-ong direktiba nga ibawal na pud nato ang pag-gamit sa pulong nga honorable. Sa tanang pangalan, sa tanang local officials sa Kidapawan. Buot pasabot ayaw ko ninyo tawaga nga honorable,” pulong pa sa 31-anyos nga Mayor nga usa ka abogado.
Siya nidugang nga bisan sa suwat ngadto kaniya dili na siya magpatawag nga honorable kay niya pa pareha ra tanan ang katawhan ugaling lang isip mga opisyales, duna silay mga dagko nga responsibilidad. Giklaro sa Mayor nga mga public servants ang mga elected officials ug dili na angayang tawgon nga honorable sa mga tawo. “Pare-pareha ra man ta, mao nga wa nay word nga honorable. Akong giawhag tanang opisyales nato, dili man ta honorable, public servant man ta.”
Gawas nga dili na sila tawgon nga honorable, laing ipatuman ni Evangelista mao nga i-live stream sa Facebook ang Bids and Procurements sa Kidapawan LGU; “No Gifts policy” ug “No Tips policy”sa tanang mgaΒ opisyales lokal ug barangay sa siyudad lakip na sa tanang mga opisina; bawal ang pagbutang sa mga ngalan ug nawong sa mga public officials sa tarpaulins sa mga government projects ug ang paghatag ug kahigayunan sa “negotiated procurement” sa siyudad sa tanang mga local farmers, fisherfolks, cooperatives, women’s group ug mga organized 4P’s groups.
Gawas nga abogado nga nitapos sa Ateneo de Davao University (ADDU), usa sab ka registered nurse nga nigradwar nga Cum Laude sa maong unibersidad ang batan-on pa nga Mayor sa Kidapawan City./CCO
