By JOSEPHUS QUIJANO
Chief Correspondent
CEBU CITY- Gipreso ang usa ka hamtong nga babaye human siya gitumbok nga maoy nipalit sa usa ka bag-o pang natawo nga bata sa Cebu City Medical Center (CCMC) niadtong nilabayng Marso ning tuiga.
Si alias “Hazel” (tibuok ngalan gipugngan), 45, gidakop sa mga sakop sa City Investigation and Detective Management Unit (CIDMU) sa Cebu City Police Office pasado alas 6:00 sa buntag kagahapon, Martes, Hulyo 22, 2025 didto sa pinuy-anan niini sa Sitio Tabay, Barangay Guadalupe.
Ang dinakpan nalutsan ug Warrant of Arrest nga pinirnahan ni Honorable Judge Leah Iligan Geraldez sa RTC Branch 20 nunot sa kaso nga kalapasan sa Republic Act 11862 kun Expanded Anti-Trafficking in Persons Act of 2022 gumikan sa pagpalit niya usa ka masuso nga anak saΒ managtiayon nga taga Barangay Duljo Fatima niadtong Marso 9 ning tuiga.
Ang manag-tiayon nadakpan na hinoon sa sayo pa ug pulos nabalhug karun sa Cebu City Jail human nga nabisto ang ilang gibuhat gikan sa ilang usa ka anak nga nanabi sa ilang silingan nga palitan siya ug bag-ong cellphone kay nabaligya na ang ilang kamanghuran human gipanganak.
Nadakpan ang magtiayon nga nagsugal ug “tong-its” sanglit kwartahan sila niadtong panahuna gani gituhuan sab nga ang uban nilang kwarta gipalit nila ug “shabu.”
Balor ug P100,000 ang pagpalit sa bata apan ang magtiayon nitug-an nga P30,000 ra gyud ang ilang nadawat sanglit didto ang P63,000 sa middleman nga mao na sab ang nitug-an sa kapolisan kun si kinsa gyud ang nakapalit sa bata.
Bisan ug gisagop sa dinakpan ang bata apan kalapasan gihapon sa balaud ang iyang nabuhat sanglit walay legal adoption papers ang iyang pagsagop, hinoon tugtan siya sa korte nga makapyansa ug P200, 000 bugti sa iyang temporaryong kagawasan samtang i-hearing pa ang kaso.
