TAXI DRIVER GIDAKOP HUMAN NAANGOL ANG IYANG PASAHERONG BABAYE SANGLIT GIPADAGAN NIINI ANG IYANG TAXI BISAN UG
WALA PA HINGPIT NGA NAKANAOG
By PAUL LAURO
Senior Correspondent
Gi-hold sa Traffic Enforcement Unit (TEU) sa Cebu City Police Office ang usa ka taxi driver nga nakaingon nga naangol ang iyang pasaherong babaye human kini nasukamod sanglit gipadagan na niini ang iyang taxi bisan ug dili pa hingpit ang pagkanaog sa maong pasahero.
Giila ang driver nga mao si Silvestre Tejares Ebarita, 41, driver sa white Toyota Vios sa EMJ taxi (plate No. VK 8098) nga mulopyo sa Guadalajara St., Barangay Guadalupe, Cebu City.
Ang reklamante nga pasahero nga si alias “Vangie”, 51, (tibuok ngalan gipugngan) taga Poblacion, San Fernando desidido gyud nga mupasaka ug kaso batok sa maong driver.
Asoy sa pasahero nga nikanaog na lang sila pasado alas 9:00 kagabii, Lunes, Hulyo 21, atbang sa Red Planet Hotel sa Archbishop Reyes Avenue sanglit wala sila nagkasabot sa pletehan gikan sa Ayala Center mall paingon sa Baseline Premier condominium sa Juana OsmeΓ±a Street, Barangay Camputhaw.
Nahibawo nang daan ang driver nga lima sila ka mga pasahero ang nisakay apan nisugot ra gihapon kini ug nahitabo ilang panaglalis dihang nibungat kini ug P150.
Kuyog sa iyang duha ka anak babaye ug duha sab ka igsoong babaye, nakahukom sila nga manganaog sanglit duol ra man ang nadagan sataxi gikan sa Ayala apan bisan ug wala pa siya hingpit nga nakanaog – nipaturatoy na ug dagan sa taxi ang driver.
Nasukamod sa sementadong dalan ang maong ginang ug napangos gyud ang iyang tuhod ug siko samtang nabun-og sab ang iyang buko-buko.
Nirespondi ang mga sakop sa TEU sa maong panghitabo ug nadala sa Perpetual Succour Hospital ang maong ginang nga pasahero kinsa mupasaka gyud ug kasong Reckless Imprudence Resulting to Injury sa driver sa maong taxi nga gi-hold sab sa opisina sa TEU./with CCO
