By JOSEPHUS QUIJANO
Chief Correspondent
Dead on Arrival sa Mandaue City District Hospital ang usa ka babaye nga backrider sa motorsiklo human siya napasok sa usa ka prime mover truck nga ilang nakabangga samtang sila nagbyahe sa AC Cortes Street, Barangay Cambaro, Mandaue City.
Ang biktima nga si Gechile Lucion Beltran, 26, taga Barangay San Jose, Cebu City maoy angkas sa TVS motorcycle nga gimaneho ni Rey Borces taga Barangay San Jose gihapon dihang nahitabo ang disgrasya pasado alas 2:00 kagahapon sa hapon, Martes, Hulyo 15 taliwala sa huot nga dagan sa traffic didto sa Cambaro.
Segun sa inbestigasyon sa Traffic Enforcement Unit (TEU) tupad sa usa ka Sino Howo truck nga gimaneho ni Teodie Ycot, 36, taga Barangay Tabok, Mandaue City habig sa wala nga bahin ang mga sakay sa motorsiklo apan kalit kining naigo sa maong truck dihang muliko na unta kini paingon sa Lapu-Lapu City hinungdan nga sila nangatumba diha sa dalan.
Sanglit dili makita sa driver sa prime mover nga gipanag-iya sa Cebu Ryle Trucking and Logistics Corporation napasok ang back rider sa maong motorsiklo maong nakaagum ug grabeng kadaot sa iyang lawas.
Gidala pa siya sa naasuyng ospital sa Mandaue City apan wala na gyud siya matabang sa mga doktor sa maong tambalanan.
Sumbong Reckless Imprudence Resulting to Homicide ug Damage to Property ang atubangon sa driver sa prime mover sa higayon nga dili maresolbar sa amicable settlement ang maong panghitabo./with a report from Alan Tangcawan
