Niisyu na ug business permit si Santa Fe Mayor Ithamar Espinosa ngadto sa usa ka beach resort sa maong lungsod nga gipanag-iya ug usa ka konsehal nga didto nidagan sa partido sa iyang kontra sa politika.
Nabisto ang pag-isyu sa maong permit sanglit nipasalamat man mismo si Santa Fe municipal councilor Joan Gay Pasasadaba Nepangue diha sa Facebook human naisyu ni Mayor Espinosa ang permit alang sa Beach Placid Multi Ventures, Inc. ingon man sa D’Sip Grill and Restobar nga iya gihapon ni Nepangue.
“Thank you kaayo Mayor Ithamar Espinosa! No words can describe our gratefulness,” segun pa sa FB post sa maong konsehal kagahapon.
Apan niadtong Enero ning tuiga si Nepangue ug ang anak niini nga si Kaitlyn Ashly Pasasadaba Majetic nikiha sa Visayas Ombudsman batok ni Espinosa ug “Grave Misconduct, Grave Abuse of Authority” ug sa hepe sa Business Permit and Licensing Office (BPLO) sa maong lungsod nga si Maranatha Rose Moralde.
Wala dayun mahibaw-i sa 𝐍𝐞𝐰𝐬𝐭𝐚𝐫 𝐏𝐡𝐢𝐥𝐢𝐩𝐩𝐢𝐧𝐞𝐬 kun gisibog ba ni Nepangue ang iyang kaso batok ni Espinosa ug Moralde agig bugti nga maisyu ang iyang mga business permit.
Si Nepangue maoy bugtong nidaug sa lineup ni kanhi municipal councilor Paulo Esgana nga niatbang ni Mayor Espinosa sa niaging May 12 elections.
Taliwala sa pag-isyu ug business permit ngadto sa duha ka negosyo ni councilor Nepangue, gimando sab ni Espinosa ang pagpasirado “TEMPORARILY CLOSED” sa JCAD Resort nga iya sa magtiayon nga sila Joshua ug Jenny Armamento sa Barangay Maricaban.
Si Jenny Armamento kinsa No. 1 barangay councilor sa Maricaban didto sab nisimpatiya sa grupo nila ni Esgana sanglit nidagan man kini nga Provincial Board (PB) member sa grupo ni kanhi Cebu 4th district Congresswoman Janice Salimbangon nga mao sab ang niagak sa grupo ni Esgana.
Sa wala pa ang closure order ug wala pag-isyu ug business permit sa JCAD Resort, si Joshua Armamento kinsa usa ka “Born Again Christian Pastor” nikiha na sab ni Espinosa sa Ombudsman niadtong Oktobre 2024 human nga wala muhatag ug “Mayor’s Permit” sa gitukod nga “Wesplash Water Park” sulod gihapon sa JCAD Resort bisan ug tataw nga dugang tourist attraction kini sa maong lungsod nga naila isip resort town sa Bantayan Island.
Si Espinosa kinsa last term karun isip Mayor, pulos naka-isyu ug mga permits niadtong 2020-2021 apan takulahaw lang nga wala na mutugot bisan sa kaandam sa JCAD nga musumitir sa tanang requirements lakip na sa pagbayad ug mga administrative penalties.
Ang Visayas Ombudsman wala pa makaresolbir sa kaso nga gipasaka batok ni Armamento.
📷 FB grab photos
