CEBU CITY – “Dismissal from the service” ug pagpasaka ug kasong kriminal ang gimando sa Ombudsman labot niadtong kanhi opisyal sa Cebu City Fire Station nga nadakpan sa entrapment operation sa National Bureau of Investigation gumikan sa pagpangilkil niini ngadto sa usa ka babaye nga aplikante sa pagka-bumbero.
Kini maoy nadangatan ni Fire Inspector Roy Mat Sanguenza Castro kanhi hepe sa Fire Safety Enforcement Section sa Cebu City Fire Station kinsa nadakpan sa entrapment operation sa mga ahente sa NBI Central Visayas Office (NBI CEVRO) niadtong Hunyo 27, 2024 sa usa ka restaurant sa Archbishop Reyes Avenue kun diin iyang gidawat ang tipik sa P400, 000 nga iyang gibungat.
“WHEREFORE, the Office finds ROY SANGUENZA MAT CASTRO administratively liable for violating Section 7 (d) of RA 6713 and Grave Misconduct. Accordingly, he is meted the penalty of DISMISSAL FROM SERVICE, with perpetual disqualification to hold public office, forfeiture for retirement benefits except accrued leave credits, Cancellation of Civil Service Eligibility and prohibitions from taking Civil Service Examinations,” tipik sa resolusyon sa Ombudsman sa maong kaso nag-ingon.
Gawas sa dismissal ni Castro sa aspetong administratiba sa kaso, segun sa press release sa NBI CEVRO ang Ombudsman mimando sab nga pasakaan ug kasong kriminal nga “Indirect Bribery” ug ‘kalapasan sa anti-graft law” kun RA 6713 ang nahingtungdang bumbero kabahin sa Code of Conduct and Ethical Standards for Public Officials and Employees.
Ang complainant ni Castro mao ang aplikante nga si ROCHELLE QUIMBO kinsa nitumbok nga nangilkil ug P400, 000 si Castro arun siya dawaton isip Fire Safety Officer 1 bisan pa ug nipasar na siya sa mga deliberation ug examinations, gani kadto na ang ikatulo nga higayon nga siya ni-apply.
Tungod sa pagbungat sa maong kantidad nakadesisyon si Quimbo nga mutahu sa NBI hinungdan nga napahigayon ang entrapment operation diin daan nang niingon si Castro nga ang dakong pahat sa kantidad iyang ihatag sa iyang mga labawng opisyal apan gipanghimakak kini sa mga kadakuan sa Bureau of Fire Protection.
Usa sa mga ebedensya batok ni Castro mao ang video footage sa gipahigayon nga entrapment operation.
