LAPU-LAPU CITY- Gibantog nga “most expensive wood in the world” – malampuson nga nasakmit sa mga tinugyanan sa Bureau of Customs (BoC) Subport of Mactan dinhi ning maong siyudad ang mga pinauga nga bahin sa “AGARWOOD” nga paingon na i-export sa Malaysia ug United Arab Emirates (UAE).
Gipahigayon ang operasyon sa usa ka iladong warehouse facility niadtong nilabayng Byernes, Nobyembre 21, diin nadiskobre ang lima (5) ka packages sa maong kahoy nga nibalor ug dul-an sa P750,000. 00 ang matag kilo tungod kay ‘high quality” kini segun sab sa pagsusi sa mga eksperto sa Bureau of Plant Industry ug sa Department of Environment and Natural Resources (DENR).
Sa report nga gipadangat ni Subport of Mactan Collector Gerardo Campo ngadto ni Port of Cebu Collector Alexandra Lumontad niabot ug 11.21 kilos ang nasakmit ug tungod mahal ang kantidad matag kilo nibalor tanan ug P8.4 million kapin.
Gilusad ang operasyon gumikan sa usa ka “anonymous informant” diin nipahibawo sa maong illegal airfreight cargo hinungdan nga gipalihok dayon ang mga operatiba sa Enforcement and Security Services (ESS), Customs Intelligence and Investigation Services (CIIS) ug X-ray Inspection Project (XIP) sa naasuyng Subport.
Nakumpirmar ang maong illegal nga exportation dihang nakita kini sa ekipo sa XIP nga gi-misdeclared nga “Alingatong Stinging Nettle” nga tataw nga kalapasan sa balaud.
Ang Agarwood dili masayon sa pag-export sanglit “endangered species” kun nihit kaayo maong kinahanglan pa ug DENR permit ug uban pang rekisitos sa dili pa kini mapadala sa gawas sa nasud.
Dili sab sayon ang pag-galam niini nga gani lakip kini sa mga protektado nga pananom segun sa Convention on International Trade of Endangered Species of Animals and Plants (CITES).
Tungod sa kanihit, mahal ang presyo sa agarwood nga maoy sangkap sa mga perfume, insenso ug mgaΒ medisina nga mahalon didto sa gawas sa nasud.
Nasayran nga gikan sa Agusan del Sur ang lima ka mga parcel nga dunay sulod niini ug gisubay na karun ang tulo ka mga exporter nga segun sa dokumento mao sila si Lance Buentra, Carlito Macane ug Arlyn Montero.
Ni-isyu na ug Warrant of Seizure and Detention (WSD) si Coll. Lumontad sa maong mga kargamento tungod sa paglapas sa Customs Modernization and Traffic Act (CMTA) segun sa Republic Act No. 10863; Wildlife Resources Conservation and Protection Act (Republic Act No. 9147) ug uban pang balaod nga nalapas.
(tipik sa AGARWOOD nga nasakmit sa BoC Subport of Mactan)
(ang mga sakop sa Bureau of Customs Subport of Mactan, DENR ug BPI nga maoy nisusi sa mga AGARWOOD nga nasakmit sa usa ka warehouse duol sa Mactan Cebu International Airport)
