Halos abo na lang sa iyang lawas ang naabtan sa kapolisan sa usa ka 75-anyos nga tiguwang babaye didto sa Brgy. Labuagon, Kibawe, Bukidnon human siya gisunog sa iyang silingan ilawom sa kalubihan sa ilang dapit.
Ang biktima nga gitago lang sa alias nga “Meding” gibunal-bunalan ug palwa sa lubi sa suspek nga si alias Dodo, 37, hangtud nga kini namatay niadtong Sabado sa buntag, Hulyo 26.
Pagka-ugma na nataho sa mga otoridad ang maong panghitabo ug ni-surinder ra sab ang suspek pinaagi sa tabang sa usa ka lay minister sa dapit human nga dunay nakatudlo sa suspek nga maoy responsable sa ni-luog nga krimen.
Rason sa suspek nga gipatay niya ang biktima sanglit kini maoy iyang gidudahan nga nibarang kaniya ingon man sa iyang pamilya apan ang kapolisan natahap nga nakasinati ug mental problem ang suspek sanglit kanhi kini nagumon sa ginadiling drugas gani usa siya ka “drug surrenderee”
Segun sa pag-angkon sa suspek kinsa pasakaan ug kaso nga murder, human niya gipatay ang biktima sa pagbunal niini ug palwa, iya kining gisunog gamit gihapon ang maong mga palwa ug mga dahon sa lubi hangtud nga hapit na lang gyud mga abo sa lawas sa biktima ang nahabilin.
📷 One Mindanao (photo credit)
