By JOSEPHUS QUIJANO
Chief Correspondent
Patong-patong nga kaso ang ipasaka batok sa usa ka polis nga sarhento ug kauban niining sibilyan kinsa gitumbok nga nanulis ug cellphone ug nipabuto ug armas didto sa Lower Linao, Barangay Lipata, Minglanilla kaganihang pasado ala 1:00 sa hapon, Martes, Hulyo 29, 2025.
Giila ang polis nga si Police Staff Sgt. ABRAHAM QUIJANO a.k.a. Brian Quijano, 45, residente sa Brgy. Tapul, Talisay City kinsa na-assign sa Regional Mobile Force Batallion (RMFB 7) apan kasamtangan nga gi-detail isip driver sa Office of the Regional Staff sa PRO7.
Ang sibilyan nga giingong iyang kauban mao si Joel Butron Mandras, 41, mulopyo ra sa Barangay Lipata.
Nirespondi ug armed person alarm ang Minglanilla Police Station didto sa Purok Nangka, Lower Linao, Lipata diin duha ka mga biktima ang nireklamo nga kalit sila gisulod sa furniture shop sa maong mga suspek ug gilabni ang cellphone gikan sa usa kanila.
Nibalhin ug usa ka warehouse ang mga suspek diin duha sab ka biktima ang nitumbok kanila nga nisinggit matud pa ang mga suspek ug “mga manyakis mi.”
Nisibat dayon ang mga suspek apan nagpasalba ang usa kanila gani daghang witness ang nakakita hinungdan nga gilusad ang “hot pursuit operation” batok sa duha nga pulos gyud nangasikop.
Kasong Violation to Domicile, illegal discharge of firearm ug theft ang ipasaka batok sa duha ka mga suspek kinsa nangapreso
karun sa Minglanilla Municipal Police Station.
Gisusi sab kun ang maong sarhento mao ba gihapon si PO2 Brian Quijano nga gitumbok sab nga nihimo ug indiscriminate firing sa iyang service firearm pipila na ka tuig ang nilabay didto sa Barangay Tapul, Talisay City human giingong gibuwagan kini sa iyang uyab./with a report from PAUL LAURO
📷 Minglanilla MPS
