Brutal ang nahiaguman nga kamatayon sa usa ka batan-ong dalaga kaganihang kaadlawon karung adlawa, Myerkules, Hulyo 9, didto sa Purok 3-A, Barangay La Filipina, Tagum City.
Giila sa kapolisan ang biktima nga si Ma. Sophia Coquilla, 19, estudyante sa University of the Philippines (UP) Diliman nga bag-o ra niuli sa ilang balay tungod sa ilang semestral break.
Napalgan siyang patay sulod sa iyang kwarto mga alas 5:00 ang takna sa sayung kabuntagon nga puno sa samad dinunggaban ug bun-og.
Nag-inusara ra sa kwarto ang dalaga ug sa laing kwarto natulog ang iyang mga ginikanan maong buntag na nila nadiskobrehan ang sakit nga kamatayon nga nahiaguman sa ilang anak.
Dunay nakuha nga CCTV footages nga dunay tulo ka mga lalaki nga nisulod sa balay sa pamilya Coquilla ug kining tulo karun ka mga lalaki ang Persons of Interest sa maong niluog nga krimen.
Gituhuang kawat ra ang motibo sa panghitabo apan kay nakamata man ang dalaga gipatay kini sa maong mga kawatan nga nidala sa cellphone, tablet, ATM ug uban pang personal nga butang niini.
Narekober sa crime scene ang sundang, cutter ug dumb bell nga maoy gituhuan nga gigamit sa pagpatay sa maong dalaga nga estudyante./CCO
