By JOSEPHUS QUIJANO
Chief Correspondent
Patay ang usa ka batan-ong lalaki samtang nanga-angol ang iyang duha ka manghud human sila gipanigbas sa ilang uyoan samtang sila nangatulog pasado alas 4:00 ang takna kagahapon sa kaadlawon, Myerkules, Hunyo 2, didto sa Barangay Owak, Asturias, Cebu.
Giila sa Asturias Municipal Police Station ang nakalas nga si Kyle Padilla, 18, samtang daghang mga samad tinigbasan ang naangkon sa iyang mga manghud nga sila Gerald Steven,10 ug Princess, 8.
Ang suspek nga si George Batomalaque, 46, nisibat human sa hitabo apan nadakpan ra sab hinoon human kini nisurinder sa usa ka barangay konsehal didto sa Vito, Balamban nga si Oliver Demecillo.
Ang managsoon unang gidala Balamban Provincial Hospital ug gibalhin sa Vicente Sotto Memorial Medical Center sa Cebu City apan nakalas gyud ang maong 18 anyos nga kamagwangan.
Segun sa inbestigasyon ang suspek dunay kasuko ngadto sa iyang pag-umangkon nga namatay sanglit gidudahan niya kini nga dunay reaksyon sa iyang asawa gawas pa nga duna sab siyay bangi sa amahan sa mga managsoon.
Narekober duol sa crime scene ang 12 pulgadas nga sundang nga gigamit sa suspek kinsa gikatakdang pasakaan ug kasong murder ug double frustrated murder.
π· Via Josephus Quijano
