Gi-raid sa mga operatiba sa Criminal Investigation and Detection Group (CIDG) ang usa ka giingong “scam hub” nga sekretong naglihok sa Barangay Alang-alang, Mandaue City, kagabii, Myerkules, Hunyo 2, 2025.
Walo (8) ka Chinese nationals ang nasikop sa maong joint operation sa mga sakop sa CIDG Mandaue City Field Unit, Cebu City Field Unit, Cebu Provincial Field Unit ug CIDG 7 Regional Special Operations Team (RSOT) human nila nakumpirmar ang kalihukan sa grupo sa usa ka giabangan nga panimalay sa naasuyng dapit.
Segun sa mga operatiba ang mga nasikop dunay gi-hire nga mga “call center agents” nga mga biktima sab sa human trafficking nga nihimo ug scam operations nga nigamit og mga online platforms aron mangilad ug mga biktima sa gawas sa nasud.
Dakog pagtuo ang mga otoridad nga ang operasyon sa mga dinakpan konektado sa halapad nga cybercrime network.
Dunay naabtan nga daghang computers, laptops, cellphones ug uban pang gadgets ang kapolisan ug nikuha sila ug warrant sa korte arun ilang masuta pinaagi sa “digital forensics” ang sulod sa maong mga modernong kahimanan./via AGL
π· AGL/Radyo One Cebu
