Nahimong “girlfriend” sa alleged mastermind sa 34 ka mga missing sabungero ang giingong female celebrity nga gilambigit sa usa mga akusado sa maong kaso nga nagtinguha nga mahimong star witness. Kini maoy kasayuran nga nitumaw nunot sab sa pagpatin-aw ni alias “Totoy” kinsa nibutyag nga alpha member sa grupo ang maong celebrity nga kanunayng anaa sa importanteng meeting niini nga iyang gilambigit sa panghitabo.
Wala hinoon panganli ang maong celebrity nga uyab sa negosyante apan sa gipahigayun nga senate hearing niadtong 2022 nipatim-aw ang gambling consultant nga si Charlie “Atong” Ang kinsa kusganon hinoon nga nipanghimakak sa iyang kalambigitan sa kaso. Depensa ni Ang kinsa gikatahu nga dunay uyab nga mga artista nga biktima siya sa conspiracy sa iyang mga kumpetensya sa iyang kanhi negosyo sa “online sabong.”
Taliwala sab sa panghimakak ni Ang ang mga biktima giingong gidagit sa buwangan sa Manila, Laguna ug Batangas diin gi-operate sa kumpaniya nga Lucky 8 Star Quest nga gipanag-iya sa maong bilyonaryo nga negosyante. Segun sa pagbutyag ni alias Totoy nga ang mga biktima gipamatay sa pamaagi nga “Killing me softly” paghigot ug alambre o “tie wire” sa ilang mga liog unya gihigot ang mga patayng lawas ug sandbags arun ilabay na didto sa Taal Lake sa Batangas.
Ang maong testigo lakip sa unom ka mga security personnel sa Manila Arena nga gilambigit sa maong kaso; Julie Patidongan, Mark Carlo Zabala, Roberto Matillano, Jr. Johnry Consolacion, Virgilio Bayog ug Gleer Codilla. Segun sa pagbutyag sa nitumaw nga testigo nga lakip sa unom ka akusado nga sagad sa mga gipatay gitumbok nga nalambigit sa “pag-tyope” sa ilang mga manok igtatari unya adto mupusta sa kontra arun siguro nga mudaug.
Dunay usa ka biktima nga si Ricardo “Jon-Jon” Lasco nga taga Barangay San Lucas, San Pablo City, Laguna nga gipatay niadtong Agosto 2021 tungod sa giingong pagkawat niini sa video sa online sabong sa grupo sa giingong mastermind ug ipasalida arun sab pustahan sa uban nga gusto musugal.
Ang mga missing sabungeros nangahanaw sukad sa April 2021 hangtud sa January 2022 diin “34” ang gikunpirmar sa mga otoridad apan matud sa pagbutyag ni alias “Totoy” muabot kini ug kapin sa usa ka gatos. Matud pa sa iyang pagbutyag ngadto sa journalist nga si Emil Sumangil sa GMA nga gilangkuban sa trienta ka mga tawo, sibilyan ug mga pulis ang nalambigit nga matud pa niya angayan nga pasakaan ug kaso.
Segun sa iyang asoy, gawas sa kaso ni Lasco nga mga polis ang nihimo, ang ilang grupo maoy mu-kidnap sa mga biktima unya ilang i-turn over ngadto sa mga sakop sa kapolisan gani ang tag-iya sa usa ka farm nga duol sa Taal Lake usa sab ka polis. Ang unom nga mga security dunay kaso nga kidnapping ug serious illegal detention under review karun sa Supreme Court human nga gibali sa Court of Appeals ang desisyon sa Manila RTC nga gitugtan nga makapyansa ang unom ug na-release gikan sa kustodiya sa PNP CIDG niadtong Disyembre 15, 2023 tungod sa desisyon ni Hon. Judge Rebecca Guillen-UbaΓ±a sa Manila Regional Trial Court (RTC) Branch 40.
Sa unom ka mga pyansado nakalansar pa pagkamayor sa Barobo, Surigao del Sur si Patidongan hinoon napildi batok sa iyang kaatbang nga si Ronnie Martizano. Si Atong Ang maoy usa sa mga nabaniog nga lakip sa World Pitmaster Cup (WPC) nga online sabong kaniadto nga dunay mga dagkong tawo nga giingong kasosyo lakip na mga politiko./CCO
π· GMA/CIDG (photo credits)
