Nasulod sa 5,000 point club sa PBA ang Sugbuanon nga si Roger Pogoy sa TNT.
Nabuhat kini sa lumad nga taga Talisay City Hunyo 21 human sa ilang ligas ra gyud nga kadaugan batok sa Magnolia, 80-79, nga nidala kanila sa semi-finals sa PBA Philippine Cup.
Nipuntos ug 18 sa maong kulba hinam nga duwa si Pogoy ug nadawat niya ang maong pasidungog atul sa half-time sa ilang semi-final duel batok sa Rain or Shine niadtong Myerkules sa gabii, Hunyo 25, gikan mismo ni PBA Commissioner Willie Marcial ug PBA Chairman Ricky Vargas.
Ang 33-anyos nga Cebuano hotshot maoy ika 101 nga PBA player nga nahimong myembro sa naasuyng prestihiyuso nga grupo nga naka-shoot ug 5,000 pataas.
Siya ang ika-walo (8) nga gikan sa Cebu nga naglakip nila ni Dondon Hontiveros, Elmer “Boy” Cabahug, Jojo Lastimosa, Arnie Tuadles, Alejo “Pongky” Alolor, Manny Paner ug Ramon Fernandez kinsa lumad nga taga Maasin, Southern Leyte apan nisugod pagsikat sa basketball sa iyang pagduwa kanhi sa University of San Carlos (USC) Warriors./CCO
