SILAY CITY- Pito ka mga tawo ang nakalas samtang kapin sa 20 pa ka indibidwal ang nanga-angol human nalimbuwad ang usa ka mini dump truck didto sa Sitio San Juan, Barangay Guimbalaon, dakbayan sa Silay, Negros Occidental. Ang mga biktima mga Job Order (J.O.) employees sa Silay City government nga gikan nagpahigayun ug tree planting activity niadtong Hunyo 27 sa buntag, Byernes.
Giila ang mga nakalas nga sila Alexander Balili, 62; Rafael Jardiolin Jr., 57; Eldie Naguita, 65; Azucena Dimson, 52; Leonillo Jerson Mirasol, 38; Marlon Amarado, 36 ug Jayme Bangis, 60, pulos ra mga mulopyo sa naasuyng siyudad. Segun sa inbestigasyon sa kapolisan nga nawad-an ug preno ang dump truck samtang nagdulhog nga may gikusgon ang dagan hinungdan nga kini nalimbuwad dihang gilikay kini sa driver nga si Hernani Magbanua, 53 nga mahulog sa bakilid.
Gibangga sa driver ang usa ka concrete barrier apan nalimbuwad na hinoon sila hinungdan nga pulos sila nanga-angol ug nagrabehan ang uban nga nisangpot gyud sa ilang kamatayon. Padulong na unta sila mupauli sa sentro nga bahin sa Silay City mga pasado alas 9:00 ang takna sa buntag human sa sayo nga tree planting activity sa lokal nga kagamhanan sa naasuyng siyudad./CCO
