Nagtingkagol sa prisuhan sa Mambaling Police Station ang usa ka hamtung nga lalaki human nanghagit og sumbagay sa pulis gumikan sa kahubog. Ang mga sakop sa Mambaling Police miresponde alas 10:20 sa gabii niadtong Dominggo, Hunyo 29, sa Sitio Barba, C. Padilla St., Barangay Duljo-Fatima, Cebu City tungod sa kasaba sa suspetsado nga namista sa dapit.
Ang suspek giila nga si Ronnelo Aldave Mernillo, 31 anyos, lumolupyo sa Sitio Tahna, Barangay Tisa. Siya usa ka graduate sa kursong IT apan kasamtangang walay trabaho. Usa ka concerned citizen ang nitawag sa police station aron ipahibalo nga adunay kasamok sa maong lugar hinungdan nga nirespondi sila Patrolman Joseph Yuri Mendo ug P/Staff Sgt. Mary Marjorie Rama uban sa mga BPSO (tanod) sa barangay nga gipangulohan ni Saldo Baydal.
Pag-abot sa mga otoridad, ilang nakita ang suspek nga hubog ug nanghamok sa mga mulupyo. Sa dihang gisulayan og pakigstorya ni PSSg Rama ang suspek, nanghagit og sumbagay ug misulti og mga bastos nga pulong batok kanila. Nagbahad pa kini nga mopasaka og kaso batok sa mga otoridad.
Tungod niini, siya gidakop tungod sa kalapasan sa Article 151 sa Revised Penal Code ug Alarm and Scandal./AGL
π· via AGL
