𝐒𝐇𝐀𝐁𝐔 𝐋𝐀𝐁 𝐒𝐀 𝐙𝐀𝐏𝐀𝐓𝐄𝐑𝐀 𝐆𝐈𝐑𝐎𝐍𝐃𝐀 𝐒𝐀 𝐊𝐀𝐏𝐎𝐋𝐈𝐒𝐀𝐍; 𝐂𝐇𝐄𝐌𝐈𝐂𝐀𝐋 𝐄𝐍𝐆𝐈𝐍𝐄𝐄𝐑 𝐍𝐆𝐀 𝐍𝐀𝐆𝐏𝐀𝐃𝐀𝐆𝐀𝐍 𝐍𝐈𝐈𝐍𝐈 𝐍𝐀𝐃𝐀𝐊𝐏𝐀𝐍

Nadiskubrihan sa kapolisan ug mga sakop sa PDEA 7 ang usa ka shabu laboratory sa usa ka apartment sa Barangay Zapatera, Cebu City. Sa wala pa ang maong operasyon kagahapon, Hunyo 30, unang nadakpan ang giingong nagpadagan niini nga si Stephen Tapulada, 32, gikan sa Western Visayas kinsa kuyog sab sa iyang uyab.

Si Tapulada segun pa ni PRO 7 Regional Director PBGEN Redrico Maranan nag-supply ug illegal nga druga lakip na party drugs ngadto na sa Boracay ug Zamboanga depende sa mu-order niini nga mga kustomer. Usa ka kitchen type laboratory ang gi-set-up sa suspek nga makamao muhimo ug shabu, cocaine ingon man ecstacy. Ang caretaker sa apartment nibutyag nga wala gyud sila kamatikod sa illegal nga aktibidades sa suspek apan ilang nabantayan nga sagad dunay muabot nga mga dagkung parcel niini panahon sa kagabhion.

Si Tapulada dunay mga suki sab sa mga high-end clubs sa Cebu basi sa surveillance ngadto kaniya kinsa nadakpan niadtong nilabayng Byernes sa kaadlawon, Hunyo 27, sa usa ka buy-bust operation sa wala pa gipahigayun ang raid sa iyang giabangan nga apartment pinasikad sa usa ka search warrant sa korte. Gawas sa illegal nga mga druga nga mukabat ug P2.2 milyones pesos nakuha sab sa mga otoridad ang usa ka armas ug mga bala niini sa maong apartment nga giabangan sa uspek kapin na sa duha ka tuig./CCO

Arnold Bustamante FB/iFM Cebu (photo credits)