By JOSEPHUS QUIJANO Chief Correspondent
Desperado nga tawo kadtong nakapusil patay sa usa ka pulis didto sa Pio del Pilar, Barangay Poblacion Danao City niadtong Byernes sa udto, Hunyo 27, 2025. Kini maoy nasuta sa inbestigasyon sa Danao City Police Station nunot sa nadangatan ni Patrolman Mark Gomer Ornopia, 27, taga Brgy. Ilihan, Tabogon, kinsa sakop sa naasuyng police station nga nitubag sa alarma niadtong higayuna sanglit diha ra siya duol sa usa ka pawnshop (dili sa usa ka 7Eleven store sukwahi sa unang tahu) dihang nangilog ug revolver sa usa ka gwardya sa maong establismiento ang nakapusil patay ni Ornopia.
Giila ang maong tawo nga si Argie Agravante Catipay, taga Barangay Salamanca, Toboso, Negros Occidental basi sa PhilHealth ID nga nakuha diha kaniya. Segun pa ni Danao City Chief of Police PLTCOL Henrix Bancoleta nga niabot si Catipay sa Danao arun mangita ug trabaho apan napakyas maong sa dalan na lang kini nagpuyo. Nagdala kini ug backpack nga dunay sulod nga tulo ka t-shirt ug gas lamp ingon man hammock kun duyan nga maoy iyang katulgan.
Pasado alas 12:00 sa udto nag maong panghitabo dihang nangilog ug armas sa gwardya sa pawnshop si Catipay hinungdan nga naalibwag ang mga tawo ug kay diha ra siya duol nirespondi si Ornopia apan napusilan hinoon siya sa iyang nawong. Dunay sakop sa BJMP nga nirespondi sab nga maoy nakapusil patay ni Catipay hinoon apan si Ornopia nakabsan gyud sa iyang kinabuhi paghidangat sa Cebu Provincial Hospital sa naasuyng siyudad. Ang nitaliwan nga polis nibilin sa iyang byuda diin duna silay usa ka gamay pa nga anak nga lalaki./with a report from AGL via Josephus Quijano/AGL


