Malampuson nga nasikop sa kapolisan ang usa ka amahan nga dunay nang nagtago-tago tungod sa kasong pagpanglugos mismo sa iyang kaugalingong anak nga babaye.
Ang akusado nga si Merlo Matis Tausa, 34, kinsa taga Barangay Cogon, Compostela, Cebu didto na nadakpi sa Sitio Kamansi, Barangay Sta. Rosa, Matag-ob, Leyte diin siya nagtago-tago human sa hitabo.
Tuyo nga nitabok didto sa Matag-ob ang mga sakop sa Tracker Team saΒ Provincial Intelligence Unit (PIU) sa Cebu Police Provincial Office (CPPO) pinangulohan ni PLT NOEL BAUTISTA hinungdan nga nasikop gyud ang maong tawo niadtong Lunes sa buntag, Hunyo 23, nunot sab sa koordinasyon sa mga sakop sa Matag-ob Municipal Police Station.
Gidakop ang akusado basi sa Warrant of Arrest ngadto kaniya nga giluwatan ni Hon. Maria Dee Seares, Presiding Judge, Family Court, Branch 6, Mandaue City tungod sa kaso nga QUALIFIED RAPE OF A MINOR (3 COUNTS).
Segun sa inbestigasyon 8 anyos pa ang biktima dihang nagsugod ang pagpanglugos ngadto kaniya. Nausban pa gyud kini sa makadaghan gani 14 anyos na karun ang biktima matud pa sa kapolisan.
Sanglit rape ang kaso walay gitugot nga pyansa (NO BAIL) sa akusado nga gikatakdang adto presuhon sa Cebu Provincial Detention and Rehabilitation Center (CPDRC) samtang ipahigayun ang husayΒ ngadto sa korte.
Ang amahan nga akusado TOP 1 sa wanted list sa municipal level (Compostela); TOP 7 sa provincial level (Cebu Province) ug TOP 10 sa regional level sa tibuok Central Visayas Region. /AGL with a report from CCO
